卡迪夫城护级豪赌 「0经验」艾朗蓝斯接帅印

xcy232323

上年重返卡迪夫城嘅威尔斯名将艾朗蓝斯，今季因伤患困扰坐多过踢，估唔到周六(19日)忽然变做领队，仲要喺英冠最後3轮肩负护级重任，都咪话唔大压力！
卡迪夫城上场输畀锡菲联後，排喺英冠尾2位置，但同安全区只有1分差距，护级机会仍然存在。不过卡迪夫城兵行险着，喺最後3轮生死战前，宣布将日前批评球迷嘅领队奥马列沙解雇，委任「零」执教经验嘅艾朗蓝斯做临时领队。卡迪夫城声明表示：「球会多谢奥马列沙嘅付出同热诚，祝福佢之後发展如意，艾朗蓝斯会带领球队完成今季余下赛事。」
34岁嘅艾朗蓝斯19年前喺卡迪夫城出道，足球生涯效力过阿仙奴同祖云达斯等豪门，两年前重返卡迪夫城後，仍然伤患不断，今季只踢过8场联赛，但从未教过波嘅佢突然被委以重任，周一(21日)晚主场对牛津联会系佢执教第1击，之後两场分会迎击西布朗，同埋煞科战作客诺域治。