「叛徒」复出即做英雄 利物浦最快周四封王

xcy232323

英超争霸即将完结，利物浦喺周一(21日)凌晨，凭伤愈复出嘅「叛徒」阿历山大阿诺特一箭定江山，作客1比0险胜李斯特城，依家抛离次席阿仙奴13分，最快周四(24日)就可以提前封王！至於输波嘅李斯特城，就成为修咸顿後第2支铁定降班球队。
由於阿仙奴周日(20日)击败叶士域治，利物浦今场唔能够提早捧盃，而且亦冇乜运，穆罕默德沙拿7分钟就射中柱，之後多次埋门亦逃唔过李斯特城门将五指关。正当利物浦久攻不下，最近因足踝伤缺阵逾1个月嘅阿诺特，後备上阵5分钟，就喺76分钟窝利轰入全场唯一入球，带领利物浦赢波。
阿诺特上月被爆已同皇家马德里倾掂数，夏天会以自由身过档，大批利物浦球迷即「喊打喊杀」，烧波衫兼要求将佢呢个「叛徒」全季雪藏。利物浦领队施洛赛後表示：「今场嘅头条应该系阿诺特嘅入波，而唔系佢嘅合约，质疑佢对利物浦忠诚嘅球迷真系好荒谬，佢多年来对球会嘅付出，今场复出就入咁重要嘅入球，唔应该受到质疑。」
利物浦依家领先13分，最後5轮只要拎3分就可以第20次赢顶级联赛冠军，若果阿仙奴喺周四凌晨主场输畀水晶宫，「红军」就可以不战而胜提早封王，假若阿仙奴唔「帮手」，利物浦亦可以喺周日(27日)主场对热刺，用赢波嚟庆祝重夺英超冠军。