美斯当选《时代》最佳运动员 自爆曾想返巴塞

xcy232323

       

        阿根廷球王美斯又攞奖，获美国《时代杂志》选为2023年最佳运动员，呢位36岁射手接受该媒体访问时，自爆今夏离开巴黎圣日耳门後，首选重投西甲劲旅巴塞隆拿，但未能成事，亦有想过去沙特阿拉伯搵食，最终选择加盟美职球队国际迈亚密。
        美斯10月底纪录性第8次夺金球奖，依家当选埋《时代杂志》2023年最佳运动员，加上戏剧性加盟国际迈亚密，令外界啧啧称奇，佢承认原本想重返西甲：「我首选系重投巴塞隆拿，为此作出唔少努力，但并未成功，後来有考虑加盟沙特阿拉伯球会，我了解呢个国家，佢哋正在创造一个具竞争力嘅联赛，我亦系沙特旅游大使，去当地比赛的确吸引，其实沙特联赛同美职两个选择都好有趣。」
        盛传沙特豪门希拉尔曾经向美斯开出4亿欧元(约34亿港元)年薪，吸引佢加盟，但呢位球王却选择国际迈亚密开出嘅2,000万美元(约1.56亿港元)年薪合约，据悉美斯将来退休之後，可以获得国际迈亚密股份，成为班主之一，所以宁愿收少嘅人工，都要去美职搵食。