皇马大胜笑唔出 阿拉巴韧带撕裂提早收咧

xcy232323

       


        皇家马德里喺周一(18日)凌晨西甲，主场4比1大破维拉利尔，不过赛後就冇人笑得出，事关中坚阿拉巴喺上半场严重受伤，检查後证实左膝十字韧带撕裂，今季几乎肯定提早收咧。皇马教练安察洛堤表示将会喺1月转会市场物色替补人选。
        皇马今仗表现出色，祖迪比宁咸25分钟接应莫迪历妙传头槌顶入，但冇耐後阿拉巴受伤要由军医扶离场，不过皇马场上球员未受影响，洛迪高高斯37分钟射成2比0。维拉利尔54分钟追番1粒，但皇马再次发力，巴谦戴亚斯同莫迪历各建一功，为皇马取得4比1大捷。
        赛後焦点集中喺阿拉巴身上，皇马发声明证实佢左膝十字韧带撕裂，未来几日会进行手术，教练安察洛堤表示：「我未试过4个月内有3个球员十字韧带撕裂(泰拔高图尔斯、艾达米列达奥)，但系无能为力，我哋会睇下1月可唔可以做到咩(买人)，曹亚文尼会系暂时应急首选。」