麦总黑气缠身 卡昂降落法丙

xcy232323

基利安麦巴比今季诸事不顺，正当皇家马德里欧联出局之际，佢家族拥有嘅法乙球队卡昂，亦喺护级大战净吞马堤古斯3蛋，提前3轮护级失败，来季降落法丙。
麦巴比家族去年夏天买入卡昂80%股份，并投资2,000万欧元组军及偿还部分债务，不过入主以来球队成绩未好过，长期喺榜下游徘徊，最终降班收场。
法国传媒报道，虽然麦巴比家族仍然继续持有卡昂，但来季班费肯定会大减，主教练同多位主力都会离队，几乎由零开始，麦巴比打算喺卡昂大搞青训，将从U17同U19做起，希望由法丙重上法乙。
至於「麦总」今季喺皇马亦不似预期，年初失落西超盃，近日欧联出局，西甲仍然落後，嚟紧西班牙盃决赛又要对死敌巴塞隆拿，有可能4只盃都冇晒，真正「四大皆空」，转会皇马首季如此遭遇实在始料不及。