曼联对海伦感绝望 愿意蚀本出售

xcy232323

曼联前锋海伦成「魔」2年以来，表现持续令人失望，今季演出每况愈下，各项赛事上阵42场仅入8球，比上季踢43场入16球，仲要少一半。根据《全市场》爆料，曼联管理层已对呢位22岁丹麦国脚感到绝望，愿意以5,200万镑(约5.2亿港元)出售佢，比买入价蚀2,000万镑。
海伦上场欧霸盃作客里昂，担任正选，但踢咗63分钟就被换走，被法国《队报》评为2分，仲差过连番犯错嘅门将奥拿拿，最讽刺系入替海伦嘅约舒亚舒克斯射入1球，令舆论进一步质疑佢仲有冇能力喺曼联立足。
据悉曼联已经对海伦失去耐性，计划今夏出售佢「止蚀」，只要有球会出到5,200万镑转会费，就会放人。2支意甲球队祖云达斯、拿玻里都有兴趣签入海伦，但未必可以满足到曼联嘅转会费要求。
拿玻里可能用域陀奥森汉交换海伦，呢位26岁尼日利亚国脚今季被外借去土耳其球队加拉塔沙雷，上阵33场入29球，对於曼联而言，属於唔错选择。