法比加斯宣布挂靴 全力搞好科木

xcy232323

       

        曾效力阿仙奴、车路士、巴塞隆拿等豪门嘅西班牙球星法比加斯，周六(1日)喺社交网宣布挂靴，结束佢20年辉煌嘅足球生涯。赢过英超、西甲、世盃同欧国盃冠军嘅「法比仔」，表示将会展开教练生涯，希望搞好佢有份投资嘅意乙球队科木。
        现年36岁嘅法比加斯上年离开摩纳哥，加盟佢系老板之一嘅意乙球队科木，上季意乙有17次上阵纪录，原本佢同科木签约2年，今周六突然宣布退休：「好遗憾宣布，我挂靴嘅日子终於来临，由赢世盃同欧国盃，到赢尽英格兰、西班牙、欧洲各大锦标，呢个足球之旅系我永远唔会忘记，经过20年嘅牺牲、付出同喜悦，我要同美丽嘅足球讲再见。」
        虽然球员生涯结束，但法比加斯会即刻进军教练生涯，并会由佢投资嘅科木开始：「今次决定唔系完全悲伤，因为我会跨越嗰条白界线，成为科木B队同青年军教练。我对科木嘅发展计划无比兴奋，由第1分钟开始我已爱上呢支球队，机会喺最合适嘅时间出现，我会用双手捉实佢。」