葡萄牙女战神破C朗纪录 偶像竟然系佢？

xcy232323

       

        葡萄牙女足喺今届女子世盃表现出色，喺E组最後一轮将同「擂台趸」美国女足争出线，虽然外界一致睇好美国女足，不过葡萄牙女足超新星妮莎莉夫伤愈，就令佢哋保持一丝争胜希望。妮莎莉夫上轮已打破C朗嘅葡萄牙最年轻世盃入球纪录，前途无限。
        效力宾菲加嘅妮莎莉夫，17岁就为葡萄牙女足上阵，今次首登世盃舞台，决赛周前已被睇好会上位，「金牌经理人」佐治文迪斯喺3月率先将佢招揽，系佢旗下第1个女足球员。妮莎莉夫首仗对荷兰女足因伤只做後备，令葡萄牙女足进攻力大减，不过上场对越南女足复出即入波，令佢以20岁8个月之龄，打破C朗拿度喺2006年世盃入波(21岁132日)，成为葡萄牙史上最年轻世盃入球者。
        妮莎莉夫同C朗系同乡兼同一经理人，性格率直嘅佢早前被问到世纪难题：「C朗同美斯边个劲？」呢位20岁女将就有惊人答案：「我从来都唔系特别迷C朗或者美斯，我细细个就锺意一个10号魔术师，呢个人就系艾马！佢只脚可能仲瘦过我，但佢嘅技术同视野可以解决场上所有难题。」阿根廷中场艾马球员时代曾效力宾菲加5季，成功获得妮莎莉夫欢心。