莲达卡丝杜献超级金球 球场再晕倒惹忧虑

xcy232323

       

        今届女子世盃其中一个最耀眼球星，非哥伦比亚女足嘅莲达卡丝杜莫属，呢位18岁「抗癌斗士」周四(27日)操练一度昏迷，点知周日(30日)H组次轮对德国女足神奇复出，而且仲轰入今届最精彩入球之一，带领哥伦比亚女足赢2比1。不过，莲达卡丝杜比赛尾段疑似再度晕倒，令人担心佢嘅身体状况。
        莲达卡丝杜上周操练突然晕倒，一度失去意识，估唔到对德国女足继续担正，佢喺52分钟禁区内闪身避开敌衞，窄角度下拉弓射入远柱死角，技术同射术兼备，最终哥伦比亚女足补时绝杀赢2比1，喺H组2战全胜登上榜首位置。
        初登世盃舞台嘅莲达卡丝杜，连续2场分组赛都有入波，但佢喺83分钟突然又出现不适，先喺跪喺地下，随後更全身冇力咁趴喺草地疑似晕倒，军医即刻入场为佢治疗，最令球迷震惊嘅系，莲达卡丝杜治疗後竟然再返入场比赛，去到补时先至被换走，唔少网民批评哥伦比亚女足「收买人命」。
        莲达卡丝杜3年前发现患卵巢癌，需要做手术切除肿瘤，亦做过长达半年嘅化疗，经过2年终宣布抗癌成功，但佢喺短期内2次球场上不适晕倒，令人担心佢嘅身体情况，有消息指佢系因为失眠加上比赛需求大，先至出现体力不继嘅问题。