安历基上任1个月即想辞职？PSG咁回应

xcy232323

       


        法甲豪门巴黎圣日耳门(PSG)同球星基利安麦巴比嘅「矛盾」，令球队出现新危机，根据西班牙《马卡报》爆料，刚上任1个月嘅PSG教练安历基觉得上错「贼船」，对於呢场「世纪闹剧」感到烦厌同无所适从，有意辞职。
        据悉安历基原本视麦巴比为球队战术重心，但佢自从表明拒绝续约後，已同球会关系破裂，早前被踢出亚洲之旅集训名单，PSG准备出售佢，甚至雪藏至明夏约满，结果打乱呢位西班牙名帅嘅部署，PSG飞到日本踢3场热身赛只有1和2负，包括输畀日职球队大阪樱花。因此，爆出安历基及教练团队对於PSG现时内部情况感到「唔舒服」，唔排除会劈炮。
        消息出街後，PSG作出澄清，认为有关报道系荒谬，但一波未平，一波又起，法国媒体《RMC》指PSG会长艾卡理化同总监甘波斯嘅矛盾日渐加深，艾卡理化不满对方偏袒麦巴比，质疑对方系为麦巴比打工，而唔系为球会工作，甘波斯不满艾卡理化干涉转会事务，佢亦可能因此而辞职。
        幸好PSG都有好消息，球星尼马已经复出，并喺周四(3日)热身赛，射入2球及1次助攻，协助PSG以3比0大胜全北汽车，近4场热身赛首次赢波。