【有片】C朗狂躁推人 爆粗辱骂中国球证

xcy232323

       


        周三(23日)凌晨亚冠盃附加赛，葡萄牙巨星C朗首次参加呢项大赛，率领艾纳斯以4比2击败沙比阿尔阿里，晋身分组赛。不过，呢位38岁射手并冇波入，加上比赛期间多次喺禁区内遭对手侵犯，中国球证傅明都拒绝判罚12码，令C朗极之愤怒，上半场结束後，冲前爆粗辱骂傅明，并推开一位试图同佢合照嘅在场人员，C朗嘅火爆行为随时有手尾跟，可能被亚洲足协秋後算帐。
        开赛11分钟，沙特阿拉伯球队艾纳斯凭塔利斯卡入波打开纪录，但仅过7分钟，阿联酋球队沙比阿尔阿里就由中场格辛尼扳平1比1。C朗上半场有3次杀入禁区，遭对手撞跌，即使佢不断投诉，但球证傅明都冇吹罚12码。
        战至上半场补时，C朗喺禁区内倒挂射门，省中对方球员手部，傅明一样冇表示，上半场完场後，C朗终於大爆发，掟队长臂章落地，冲向傅明面前，手指指一轮狂闹，根据现场电视台收音，听到C朗话：「醒吓醒吓，X你。」有1位唔识趣嘅场内人士，仲拎住手机，想同C朗自拍，结果被呢位前锋一手推开。
        换边後仅1分钟，格辛尼再次建功，协助沙比阿尔阿里反超前2比1，但战至最後阶段出现戏剧性发展，艾纳斯88分钟扳平2比2，补时再靠塔利斯卡、波索域各入1球，奇迹反胜4比2，其中最後1个入球来自C朗嘅助攻。
        赛後C朗忘记上半场不愉快事件，非常兴奋同队友一齐庆祝，但佢爆粗辱骂球证，以及推人一幕嘅片段喺网上疯传，证据确凿，亚洲足协可能会介入调查，甚至作出处罚。