再多2女控告安东尼袭击 疑有暴力倾向

xcy232323

       


        曼联球星安东尼马菲奥斯家暴案搞到满城风雨，周五(8日)再有新发展，巴西传媒证实再多2名女子指控安东尼袭击，令未有对安东尼禁赛嘅曼联承受更大压力，呢位巴西国脚亦被怀疑有暴力倾向。
        安东尼被前女友Gabriela Cavallin控告4项袭击罪，圣保罗同曼彻斯特警方都进行调查，巴西媒体《Jornal Extra》再爆料，指安东尼原来唔系第1次面临袭击指控。巴西警方喺2022年5月份，已收到女子Rayssa de Freitas报案，报称喺离开圣保罗夜店後，被安东尼同另一球员杜度嘅前妻Mallu Ohana袭击，当时佢喺民警安排下去医院验伤。
        一波未平一波又起，第3名女子Ingrid Lana接受《Record TV》访问爆料，呢位33岁银行职员指上年10月被安东尼袭击，佢喺访问入面话：「安东尼想同我上床，但系我唔肯，佢就推我埋墙同打我个头。」消息指呢个访问会喺星期日(10日)先播出，唔排除会有更多「内幕」。
        曼联日前发声明回应安东尼事件，表示要等警方收集更多资料先再作评论，未有好似处理格连活特家暴事件咁发出停赛令，引起唔少争议。Cavallin早前作供表示，安东尼家人都知佢心理有问题，请埋心理医生帮手都改善唔到，怀疑呢位翼锋有暴力倾向。